Oranjestad – Minister di Salubridad Publico y Deporte, Dr. Richard Visser a cuminsa su dia diaranson na Taste of Belgium unda cu el a participa na un actividad di movecion pa miembronan di nos comunidad 60+. Tur hende a pasa bon, haciendo ehercicio sinta riba nan stoel cu musica hip y despues a lanta para pa haci nan "stretching" y "cool down" e curpa. Tur hende, incluyendo Minister Dr. Richard Visser a sinti nan mes yen di energia pa sigui durante di dia.
E mandatario tabata hopi satisfecho pa constata cu rond Aruba tabatin eventonan y actividadnan organisa cu Dia di Movecion den mente.

E iniciativa pa haci esaki a bin di Fundacion Movimiento ta Bida cu durante basta siman a pasa ta motiva instancianan, negoshinan, scolnan y hendenan individual pa participa na un otro actividad pa 30 minuut. E rason cu a scoge pa "30 minuut" ta cu esaki ta e norma cu tur investigacion ta mantene y promove pa  un bida mas saludabel. Pa otro aña ya caba Minister Dr. Richard Visser a pensa riba un actividad y lo pidi pa tur hende laga kico cu nan ta haciendo un banda pa 10'or di mainta y ful Aruba move di unda cu nan ta pa 30 minuut.

Cerando e Dia di Movecion, Minister Dr. Richard Visser hunto cu su Ministerio na oficina a sali di Bestuurskantoor despues di trabao y a core un ruta di 5 km riba L.G. Smith Boulevard. Esaki sigur tabata un bon idea y a yuda tur hende kita nan mente di e stress di tur dia y aunke cansa y soda despues, sigur a yuda nan relaha.

Den e siguiente simannan, Minister Dr. Richard Visser lo ta den reunionnan cu expertonan internacional pa bin cu mas idea y programanan cu ta yuda motiva nos populacion henter pa move mas y come mas saludabel pa evita obesidad y malesanan cronico.