Oranjestad - Diaranzon merdia a sali cu e lancha “Don Andres” un embarcacion di diezseis (16) cu lo competi e fin di siman aki den e feria equino “Inter” na Corsow. E feria ta tuma lugar na e rancho “Hijo de David” di Norman Hugo. E competencia ta tuma lugar diasabra y diadomingo, mientras cu diabierna, lo tin e celebracion, ya cu Aspafico ta cumpli 30 aña di existencia.

E ehemplarnan cu a viaha diaranzon ta representa cuater (4) rancho na Aruba. Rancho Paso Fino di Mario Bruin a manda Rematadora y Bandolero. Criadero Alma di Alex Mansur lo competi cu Sucesora de Indigna, Ritmico de Potrillos y Eos. Expreso (capon paso fino), Mision de Agualinda y Sahari ta representa Rancho Monte Blanco di Oscar Werleman. Di Rancho Monte Blanco a viaha Expreso de Alto Vista di famia Oduber, Dulzura, Yerbabuena, Aramis, Candil y Fogonazo.
Tambe Aruba lo competi cu algun jinete y amazona.

E competencia lo ser dedica na e legendario juez equino, Jose Joaquin Quintero, mihor conoci como Don Joaco, kende a huzga tanto na Aruba como na Corsow den pasado.

Na Aruba, OCA ta trahando duro riba su celebracion di 25 aña. E highlight lo ta “Interpaso” den luna di September. Na e occasion aki ta spera un cantidad grandi di bishitante di Corsow, Colombia, Puerto Rico, Republica Dominicano, Merca y Venezuela. Ya caba tin un tour operator na Bogota ta mercadiando Interpaso como un trip turistico cu no por falta.

Ta sperando cabai di Corsow, Venezuela y Colombia, pero no ta exclui algun di Puerto Rico tambe.