Oranjestad - Despues di hopi aña di trabou y preparacion, nos artistanan local awor por mira atras na un logro importante den nan carera. Pa prome bez, tres museo masha popular na New York ta dedica un exhibicion na Caribe, den cual Aruba tambe ta participando. Minister Michelle Hooyboer-Winklaar a bishita e exhibicion y a topa cu e artistanan pa personalmente felicita nan pa esaki.

"Caribbean Crossroads of the World" a cuminsa desde dia 12 di juni y cu ta sigui te cu dia 6 di januari 2013 den "El Museo del Barrio", "Queens Museum of Art" y den "The Studio Museum of Harlem" na New York. Mester menciona cu e exhibicion na The Studio Museum in Harlem lo termina dia 21 di october 2012. E exhibicion aki ta consisti di riba 500 trabou di arte durante e ultimo 400 añanan, enfatisando e relacion entre Caribe y Merca. A pone hopi enfasis riba e contribucionnan regional di identidad y pertenencianan. Mas ainda den e exhibicion ta ilumina ideologianan, comercio, cultura, politica y cultura popular di henter Caribe, pues tambe di paisnan cu ta na costa di Caribe manera Miami, Venezuela, Colombia, etc.

Caribbean Crossroads of the World ta contene mas cu solamente exhibicion. E ta bin compaña cu eventonan special, programanan educacional y tayernan pa studiante. Tin asina tanto atencion riba e exhibicion aki cu The New York Times a skirbi un articulo masha extenso y bunita di dje.

"Mi ta hopi orguyoso di cu den e 379 artistanan participando na e exhibicion aki, cu tin algun Arubiano tambe. Nos ta demostra aki cu nos artistanan ta na nivel mundial", asina Minister Michelle Hooyboer-Winklaar a enfatisa. E mandatario ta mira atras riba un logro importante, pasobra for di 2 aña pasa a bishita El Museo del Barrio y a haci hopi trabou pa finalmente alcansa e meta.

Riba e fotonan adhunto por aprecia momento cu Minister Michelle Hooyboer-Winklaar tabata di bishita na Museo del Barrio hunto cu algun invitado di Aruba y cu nos artistanan local. E ta yena nos tur cu masha orguyo pa mira con "Aruba" ta briya na New York den e exhibicionnan di arte di Caribe.