For di april aña 2010, den un reunion publico, Parlamentario Donny Rasmijn a trece pa dilanti cu tankeronan no por bin ankra sin ningun costo y sin ningun regulacion den nos awanan teritorial. Esaki a tuma lugar net durante di e oil spill grandi cu a tuma lugar den Golfo di Mexico unda cu casi 6 miyon bari di crudo a derama den e golfo. Pa decenas di aña tankeronan ta ankra den nos teritorio pa diferente motibo. E por ta pa haci mantencion, pa  bende productonan petrolero of pa simplemente warda riba un orden di nan doño pa busca producto petrolero cualkier lugar. Tur ta ankra pa zuid di Aruba pasobra e lama ta favorabel pa nan. E no ta hopi hundo, no tin mucho coriente y nan no ta paga pais Aruba nada. E factornan aki ta bon pa nan pasobra no mester tira anker den un profundidad mucho hundo y e tankero ta basta stabiel pa ora nan ta eherce lightering of bunkering di producto. E anker ta haci hopi daño na e fauna di nos lama. Cualkier coral of mata cu tin den e fondo ta wordo destrui pa motibo di e anker. Durante di lightering, un producto ta wordo cumpra y pasa pa un barco pa un otro. Pues tin negoshi ta tuma lugar den nos awanan teritorial mientras cu nos pais ta core riesgo cu azeta por derama den lama y termina riba nos beachnan cu tur e consecuencia pa nos economia turistico. “Si tin un derame di petroleo den nos awa teritorial y e producto bin riba nos beachnan, e lo ta e desaster economico mas grandi cu nos pais lo experencia. Lo e ta peor cu dia Lago a sera pasobra 70% di nos economia ta depende di nos turismo cu ta bin Aruba pa specialmente nos beachnan”. Pa colmo nos pais no ta gana un entrada cu e barconan aki, cu excepcion di cierto companianan cu ta hiba of trece productonan na e barconan. E peliger cu e barconan aki ta trece cu nan ta hopi mas grandi di locual cu nos pais ta gana cu nan. Cu e ley nobo aki, cu lo drenta na vigor pa 1 di juli di e aña aki, tur e barconan mester haña permiso pa ankra y nan mester paga un liggeld. Tambe nan mester paga pa cada bari di producto cu nan bende por medio di lightering. Pa proteccion di nos medio ambiente tambe nan mester cuminsa paga un ‘Milieu Heffing’ cu lo wordo utilisa pa combati cualkier derame di petroleo cu por tin. Ademas di regulacion, cu e ley nobo aki nos pais ta ratifica diferente tratadonan maritimo internacional y ta re-emplasa e ley bieuw, havenverordening, cu tabata existi desde aña 1993. E reunion mes a bay den bon ambiente y tur fraccion a trecenan opinion y preguntanan al caso dilanti na un manera hopi eficiente. “Mi ta tuma e oportunidad aki pa gradici Minister Otmar Oduber, Parlamento y tur esnan cu a traha deligentemente riba e ley aki cu seguramente ta na bienestar di Aruba. Tambe mi kier felicita nos pueblo cu e logro importante aki unda cu e ley pa regula tankeronan cu ta ankra den nos awa teritorial a wordo aproba unanimamente den Parlamento”, Rasmijn ta reitira.