Oranjestad - Aruba Bank ta consciente cu specialmente e entrepreneur hoben, cu recien a cuminsa of ta cuminsando cu su negoshi tin e necesidad di sinti cu e tin apoyo y semper ta bon pa e ta sinti'e motiva y encurasha. Aruba Bank kier yuda su clientenan prepara pa ta of bira entrepreneurnan exitoso y  positivo.

P'esey Aruba Bank hunto cu Prof. Dr. Ryan R. Peterson ta organisa e tayer "Seven Habits of Effective Entrepreneurship" gratis pa tur nan clientenan di e sector "Small Business” y publico general. Esaki ta e di prome biaha cu e workshop aki ta wordo duna na Aruba y esaki ta un contribucion cu Aruba Bank ta duna como apoyo na tur su clientenan y tur comerciante chikito en general. Tambe, e workshop aki ta un follow up ariba e programa di Mission to Brazil, pa cua Aruba Bank tabata un di patrocinadonan principal.Basa riba mas di dos decada di experencia practico di coach entrepreneur y lider profesional, ademas di su experencia academico y investigativo riba e temanan di entre otro 'the psychology of innovation' y 'effective entrepreneurship', Prof. Dr. Peterson  mes a diseña e workshop aki di “Seven Habits of Effective Entrepreneurship".

Den pasado Prof. Peterson a duna e workshop aki caba na Europa y Merca, y den ultimo aña a trece e workshop den Caribe na entre otro Barbados, Cayman Islands, Curacao, Sto. Domingo y Jamaica cu hopi exito.Prof. Peterson lo duna tipnan valioso y splica e shete habitonan di entrepreneurnan efectivo, cual ta yuda e entrepreneur di ta efectivo y tambe exitoso.

Segun Prof. Peterson e un entrepreneur exitoso tin cierto habilidad y actitud cu ta bay mas lew cu djis un habilidad of conocimiento tecnico di con pa traha un business plan of un plan di mercadeo. E actitud y inteligencia emotional y creativo di e entrepeneur ta esencial den exito di su negoshi. Hopi negociante ta exitoso pasobra sea nan a crea un rutina cu ta funciona pa nan y nan tipo di negoshi o sea nan a crea custumbernan den practica efectividad. Loke nan ta haci tin un efecto directo ariba nan funcionamento y e exito di nan negoshi. Durante e tayer, Prof. Peterson lo revisa e shete custumbernan cu ta prueba di ta loke mayoria, of por bisa hasta tur, entrepreneur efectivo ta eherce, consciente of inconscientemente. Un parti special di e tayer ta cu participantenan mes lo discubri nan habilidad y custumbernan di pensa y actua. Di e manera aki e tayer ta un workshop interactivo y dinamico unda lo bo 'discover your strengths'. E intencion principal ta pa medio di e workshop aki, Aruba Bank yuda su clientenan corporativo cu negoshi chikito y entrepreneurnan en general adopta e custumbernan aki y sea mas efectivo den nan funcionamento. Efectividad ta esencial pa crea un balansa y organisa e tempo cu e entrepreneur ta dedica na su negoshi y su tempo personal, entre otro.

Esaki ta sigur un di e retonan mas grandi cu hopi entrepreneur tin awendia.Aruba Bank ta invita tur clientenan di e sector Small Business, participantenan nan di Mission to Brazil y e publico general, pero particularmente profesionalnan y gerentenan hoben pa participa na e tayer aki. E tayer ta un total di dos ora y lo tuma lugar na Young Entrepeneur Center na Aruba Bank Camacuri.  E entrepeneurnan por inscribi pa e workshop gratis aki  te diabierna, dia 29 di juni.

Por registra mandando un email riba workshop7habits@arubabank.com. E tayer registracion ta cuminsa 5'or y mey di atardi y e tayer mes ta tuma luga di 6'or di atardi pa 8'or di anochi.E workshop "Seven Habits of Effective Entrepreneurship" ta consisti di un introduccion, e parti practico cual ta guia bo con pa discubri bo puntonan fuerte, conclusion y un session di pregunta y contesta.