No tin ningun duda cu e programa “Perde Pa Gana 5”, patrocina pa Subway conhuntamente cu Aruba Bank, Nature’s Discount, Dufry y Ciclovia, ta causando furor y impacto total riba Aruba. Cada siman cu pasa y faltando solamente 2 siman mas, e intensidad ta aumenta como tambe e retonan y e gana di e participantenan pa ta e ganado absoluto.

Diadomingo cu a pasa, mester bisa cu e training nan a bay hopi bon mes. E participantenan a core for di Tamarijn Hotel te na tiki pazuid di La Cabana Hotel, cu algun stop di coremento, pa haci algun ehercicio, manera; push ups, jumping jack, sit ups y diferente otro tipo di ehercicio mas, pa nan soda y kima mas vet.  Tabata trata di training riba beach cu tabata extra y duro, pero flexibel pa tur participante participa. Loke ta di remarca y aplaudi ta, cu e grupo a keda grandi, ya cu un cantidad di participante ta siguiendo e programa, no solamente pa nan propio salud, pero tambe pa sostene e teamnan geel y berde.

Pa 5 aña caba, Subway ta kere fuertemente y ta promoviendo pa tur hende come y biba saludabel. P’esey mes, Subway ta pone su Meal Plan di Fresh Fit cu un variedad di sandwich super saludabel y bou den caloria. Y pa promove y yuda e participantenan pa come saludabel, Subway ta duna nan descuento riba nan Healthy Meal Plans. “Nos ta comprometi pa sigui aporta na nos aporta na nos comunidad, no cu solamente comemento, pero sigur den combinacion cu conduci un bida saludabel na nos pais.” Subway Corporate a keda encanta cu e idea cu Norman Thijsen hunto cu Renee Wild y Niurca de Cuba a trece y a kere mesora cu e programa lo bira un exito total.

Despues di un tremendo competencia di volleyball entre e dos teamnan, nan a bay Alhambra pa un biaha mas, pisa, pa mira cua ta e grupo cu a haci nan best e siman aki. E participantenan di grupo geel a bolbe gana e siman aki, cu 14.5 kilo, cu ta representa 2.1 kilo mas hopi cu e participantenan di e team berde. E total di kilo cu e dos gruponan a baha ta 26.9 kilo y si conta desde inicio di e programa te awo, ta un total di 95.5 kilo. Tanto Renee como Niurca ta haciendo un excelente trabou y pone nan toke creativo y profesional, pa yuda nan team miho cu ta posibel. Cada siman nan ta ahusta e training p’asina yuda nan team, haciendo esaki cu amor, alma y curpa ta nan team. Loke ta importante, ta p’e participantenan gana nan salud bek y mas cu claro, gana e premionan grandi y atractivo unda diferente comerciante a contribui pa haci’e uno grandi y pa celebra e di 5 aniversario di e programa; Perde Pa Gana 5.