Oranjestad – Diamars anochi Minister di Asuntonan Economico a celebra hunto cu invitadonan special e apertura di ARINA, Aruba Investment Agency, den e monumento unda antes tabata e museo numismatico den Weststraat 15. Ta trata aki di un departamento nobo cu tin un funcion masha importante den cuadro di esfuersonan pa atrae mas inversion, tanto local como internacional.

Na e ocasion aki, Minister di Asuntonan Economico, Asuntonan Social y Cultura, Minister Michelle Hooyboer-Winklaar a enfatisa cu e cinta cora cu a wordo corta pa declara e oficina di ARINA como habri, ta simbolico pa e "red tape". E "red tape" mester wordo corta pa haci e situacion na Aruba mas facil y eficiente pa inversionnan local como tambe esunnan di exterior, semper teniendo na cuenta e reglanan y leynan na nos isla. “Aruba mester haya reconocemento como no solamente un destinacion pa turismo, pero tambe un pais cu ta e luga ideal pa haci negoshi, un luga unda ta facil pa haci negoshi y unda tambe negoshinan ta exitoso”, Minister Hooyboer-Winklaar a enfatisa.

Pa medio di ARINA, Aruba lo promove su perspectiva di negoshi. ARINA lo presenta loke nos tin di ofrece no solamente den e region, pero tambe pa inversionistanan cu kier uza Aruba como nan "head office regional" of "hub", pues e destinacion for di cual nan ta haci negoshi den e region aki.

ARINA mester sirbi como un catalisado entre sector priva y sector publico. E agencia lo promove Aruba como un destinacion pa inversionistanan, lo traha pa atrae inversionistanan y lo facilita e proceso di permiso y establecimento na Aruba. Un di e metanan importante di ARINA ta pa tin un rol activo den e diversificacion di Aruba su economia.

Minister Michelle Hooyboer-Winklaar a splica cu durante su participacion na e International Economic Forum na Montreal, unda cu companianan multinacional grandi tambe tabata representa, cu paisnan cu kier inversionistanan di exterior mester ta pro activo y dinamico. Un pais mester constantemente mercadea kico e tin di ofrece y kico un inversionista por spera, e mandatario a splica. Unda nos kier inversionnan tuma luga y kico Aruba kier desaroya y yega na dje como pais mester ta defini y mester wordo comparti cu futuro inversionistanan.

Minister Hooyboer-Winklaar a gradici e directora di ARINA, Sharon Erasmus y su team pa nan esfuersonan den establece e agencia aki, Minister di Finansa Ing. Mike de Meza pa su bon cooperacion y Carlos Bronzatto, director di World Association of Investment Promotion Agencies pa su presencia na e apertura di ARINA y pa su apoyo.