Oranjestad – Hunto cu mas o menos 3500 fanatico di RCA y La Fama, Minister di Salubridad Publico y Deporte, dr. Richard Visser a disfruta di un final di e campeonato di futbol di Aruba diaranson anochi den Stadion Guillermo Prospero Trinidad. Minister Visser a cualifica e wega como uno cu hopi accion. Entusiasma el a comenta na final di e wega: "Tabatin hopi mas accion cu hopi di e partidonan di EK."

E mandatario a remarca cu e publico a echt gosa y durante e partido cu a caba cu e puntuahe di 4-2 na fabor di RCA, el a mira poco tremendo hungado di RCA riba veld. Futbol ta e deporte "Rey" na Aruba y ta disfruta di hopi popularidad. Aruba tin ekiponan masculino, pero tambe femenino cu bon disciplina cu ta hopi activo durante henter aña.

Minister Dr. Richard Visser ta un gran fanatico y ta felicita tur ekipo, nan organisacionnan deportivo y nan fanaticonan, como tambe e organisadonan di e campeonato cu e tremendo campeonato di partidonan bunita y bon anima.