Oranjestad - Studiante y maestronan di Maria College mavo casi no por a kere loke tabata pasando ora diabierna mainta e artista cu ta wordo categorisa pa Time Magazine como un di e 100 personanan mas influyente na mundo, Juanes, cu a presenta na nan scol.

Un escenario chikito y ekipo di zonido a wordo instala den tempo record. E gritonan di emocion por a wordo scucha te pafo di e scol, ora cu siguridad a rondona e scol, y e gran artista Juanes a subi stage. Juanes a deleita e alumnonan cu su canticanan mas popular, pero prome a tuma un momento pa contesta pregunta y intercambia un poco cu e hobennan. E energia y actitud positivo di e cantante sigur a inspira nos hobennan pa sigui padilanti positivo y cu gana pa realisa nan deseo y soñonan.

Juanes cu ta conoci como un persona cu un curazon enorme, tin e fundacion Mi Sangre na Colombia y tambe pa su organisacion y conciertonan Paz sin Fronteras a expresa cu e ta bin Aruba tempran pa por entre otro bishita un scol.
Digicel ta un di sponsornan grandi di Aruba International Film Festival y a haci posibel pa 3000 studiante por bay wak diferente pelicula y papia cu diferente director di cine na Cas di Cultura durante e siman cu a pasa. Digicel tambe a ofrece algun studiante di diferente scol e oportunidad pa asisti na un Film Lab, caminda nan a siña mas a fondo e facetanan y tecnicanan pa traha cine.

Como cu nan a experencia e diferente gruponan di e diferente scolnan, Digicel a wordo duna e escogencia di cua scol Juanes lo bishita.

General Manager di Digicel, Remko van der Veldt a expresa cu Maria College mavo a wordo scohi pasobra nan tabatin e alumnonan cu a desplega e miho comportacion durante nan bishita na Cas di Cultura. Cabesante di Maria College, Juffrouw Garido a enfatisa cu su alumnonan durante su palabranan di bonbini na Juanes y Remko, "Bon comportacion tin su recomenpensa y...den un forma hopi sweet!"

Sr. Van der Veldt den su discurso cortico a gradici Juanes pa su gesto y a enfatisa cu e hobennan pa nan disfruta di e oportunidad unico aki unda cu Juanes y Digicel ta para banda di otro pa promove e actitud di "Yes, I can!" pa cu e hobennan. El a bisa nan pa laga Juanes inspira nan, pa nan sigui padilanti, haci nan best y crea nan futuro, trahando pa bira profesionalnan apasiona den e ramo cu nan ta desea di desaroya nan careranan.

Sr. Van der Veldt a expresa cu e ta spera cu e gesto di Digicel di duna e hobennan e oportunidad pa asisti na Aruba International Film Festival y awo cu e bishita di Juanes, cu nan tambe lo ofrece oportunidadnan y yuda nan contemporaneonan ki ora cu nan por, awo y den futuro.

E gesto di Juanes a laga un impresion imenso ariba e hobennan. Juffrouw Garido, e team di Maria College y e alumnonan no tin palabra pa discribi e experiencia. Nan ta gradici Juanes pa su bishita asina impactante y Digicel pa reconoce nan bon comportacion y scoge nan pa e regalo inolvidabel.