Oranjestad – Mirando cuanto Corsow a inverti pa mehora su caballada, no tabata mustra automatico cu e cabainan di Aruba lo por a mantene nan dominio y a hasi e mesun bon papel cu tradicionalmente nan sa hasi durante e feria internacional “Inter 2012” celebra na e isla di Corsow. Asina mes cu algun cabai di Aruba a bira malo, e dominio di Aruba tabata grandi. Mester agrega cu e nivel di e competencia sigur a surpasa e nivel di e ultimo añanan y esaki ta door di e mihor cabainan cu Corsow a hanya, pero tambe esunnan di Aruba. Esaki a keda accentua pa e huez Dominicano Gerardo Estevez den su elogio pa e caballada cu ela huzga.

Un di e highlightnan di e feria tabata sin duda e actuacion di “Teoria de la Luisa” di Villa Floralina den e modalidad di trocha. Su actuacion a duna e publico kippevel y e analisis cu e huez a duna di cada aspecto di e yewa y e conduccion di su chalan Dairo Jimenez no a laga duda cu ta trata di un ehemplar y actuacion na nivel  mundial. El a gana sin e minimo resistencia e titulo di Gran Campeona di trocha, lagando e puesto di reservada vacante. Lastima cu e yewa “Bienvenida” di Fanja Mouawad a manca door di trapa riba un piedra, si no elo a bira e reservada, ya cu e otro yewanan no por a mantene nan mes dentro di e paso di nan modalidad.

E otro highlight y atraccion tabata e campeonato di cabainan fino macho. E guerra hiba entre “Escandalo” y “Zarevich” tabata fuerte y emocionante aunke cu tur dos ta procedente di e mesun criadero. E hueznan a hasi diferente comparacion pa ta sigur cu ora cu nan saca e ganador e lo ta e decision mas corecto y acaptabel pae public grabndi cu a atende e feria Diasabra anochi. E conclusion final tabata cu “Zarevich” tabata mas keto di anca, mas rapido y a mantene su energia te na final. Esaki tabata un otro coronacion pa e montador Dairo Jimenez, kende a sali e mihor chalan di e feria. Su compañero Alex Cybul a duna su maximo presentacion pa pusha “Escandalo” te na e maximo, pero e mester a acepta e revancha y carga e cinta di Gran Campeon Reservado. Pa Villa Floralina esaki a nifica un dobbel victoria y a seya tambe e honor di keda corona como e mihor expositor di Inter 2012. Corsow tabatin hopi speranza cu e cabai “Gobernador”, pero e no a convence e hueznan suficiente pa disputa e premio grandi. E mester a conforma su mes cu un cuarto puesto.

Den yewa Alex Cybul a conduci “Tartarina” di Floralina magistralmente pa distancia su mes di e resto di e manada, pa bira e Gran Campeona di paso fino. “La Exclusiva” di Ak Rojer di Corsow a bira e prestigioso campeona reservada, ganando di yewanan importante di Aruba manera “Cantata” ,“La Lirica”  y “Yerbabuena".

Den trocha macho, “Eos” di Alex Mansur, conduci pa Gino Werleman a deskita su mes di e retador “Simbolo de CJ” di Cai Jesurun y monta pa Jose Correa pa bira e Gran Campeon di trocha.

Den trote e yewa “Conquistadora” di Floralina no a alcansa pista door di lesion recibi durante training. “La Gigi” di Antonio Castañeda y monta pa e mes, tabatin un bon actual pa bira e Gran Campeona y no ta sigur si Conquistadora lo por a yega na tumbe. E reto ey nos mester warda pa September den “Interpaso”. Reservada a bira “La Jony” di Els de Kort, kende tambe a exhibie.

Den macho e cabai recien yega di Colombia, “Pijao del Rosario” no obstante cu e viaha pa Corsow a trese su participacion na duda door di un perdida total di su apetito, tabata intocable. Algun hora prome cu e competencia e hoben cabai a mustra un resureccion pa duna Floralina su prome premio grandi di e fin di siman y laga “Presagio de Villa Victoria” di Mark Bruin como e Reservado.

Mihor criador di e feria cu batiza internacionalmente e parque ferial nobo di Aspafico a bira Hermanos Merryweather. Ta trata di un bon parquet y aunke cu e no ta full cla, e ta ofrece e facilidadnan basico cu un feria di cabai mester. E organisacion tabata den bon man y vlot den su operacion. Lamentable ta cu el a termina Diasabra den boca di 4’or di marduga, resultado di a cuminsa casi 2 hora laat. E hueznan Estevez y su compañero Diego Gonzalez di Puerto Rico a duna un bon huzgamiento, aunke Gonzalez tabata keda hopi escaso den su splicacion.