Kralendijk, Boneiro - Divi Flamingo Beach Resort na Boneiro ta celebrando e propiedad su di 60 aniversario durante henter 2012 cu un kalender di eventonan y ofertanan special mensual. Sinembargo, siman pasa, Divi Flamingo Beach Resort a honra Peter Hughes, Divi su maestro di buceo original, cu e inauguracion di e Sala Peter Hughes, cual ta un sala di reunion y  recepcion situa ariba di e tienda di buceo di Divi.

Peter a regresa siman pasa pa e resort pa un celebracion di shete dia cu a hiba e nomber “Leyendanan Historico di Divi”, yena cu buceamento, fiestanan y cordando e temponan di antes. Aki por mira e ceremonia di cortamento di cinta y recepcion di champaña cu a tuma luga diahuebs, 21 di juni, cual a conta cu presencia di miembronan di prensa Boneriano, Anja Romeijnders, Presidente, Tourism Corporation Bonaire, amigonan di e resort, gerentenan di pasado y gerentenan actual, como tambe e gigantenan di Peter su generacion, ex operadornan di buceo y maestronan di buceo, incluyendo Alan Jardine, Harry Ward, Craig Burns y Max Hillier.

Buceamento tabata crucial pa e desaroyo di turismo na Boneiro y e pioneronan trempan aki di buceo ta merece credito pa nan sabiduria y habilidad di por crea un operacion rendabel y sostenibel, segun Sara Matera, kende pa hopi tempo caba ta  e gerente general di e Divi Flamingo Beach Resort.

Den un entrevista cu miembronan di prensa, Peter ta raporta cu el a usa su siman na Boneiro pa re-introduci su mes na tur su luganan faborito di buceo riba e isla, y e por bisa orguyosamente cu Boneiro a keda un destinacion di buceo bon preserva y bon protehi. Mientras cu rifnan rond di mundo ta sufri for di contacto excesivo cu buceadornan, e rif di Boneiro ainda ta intacto den hopi luga, specialmente rond di Klein Bonaire. E trabou di e Parke Marino Nacional di Boneiro, Peter ta splica, ta sumamente balioso y ta di admira.

(E Parke Marino Nacional di Boneiro a wordo estableci na 1979, poco tempo despues cu Peter a yega na Boneiro, cuminsando na e marca halto di awa y extendiendo pa  200 pia (60 meter) di profundidad, cubriendo un area di 6672 acre, of 27 km²)

Den Peter su opinion e mision di e Parke Marino Nacional di Boneiro, protehando y manehando e isla su recursonan natural, cultural y historico, mientras cu el a permiti uso cu ta ecologicamente sostenibel, a saca su frutonan, y e mantencion y restauracion continuo di e ecosistemanan a yuda e isla su diversidad biologico, y e procesonan ecologico, na e beneficio di futuro generacionnan.

Peter Hughes a cuminsa traha na Boneiro riba e di dos dia di Pasco, 1975, tumando mando di loke tabata e isla su prome operacion di buceo, na e Flamingo Beach Club. Den e tempo ey, tabatin solamente dos hotel: e Flamingo Beach Club cu 26 bungalow, y e propiedad mas grandi, cual awo ta defunto, Hotel Bonaire. “For di e prome dia na 1975, nos tabata ricibi cuater pa seis buceador den un dia,” Hughes ta recorda. Un decada despues, e hotel, cual a cambia su nomber pa Divi Flamingo Beach Resort, tabata hibando 275 buceador pa dia, seis dia pa siman, pa explora e awanan di Boneiro, cu un nivel incomparabel di confortabilidad y conveniencia, y e tienda di buceo original y chikito a expande considerablemente pa acomoda e cantidad di buceador cu semper a sigui crece.

Serge, Gerente di Operacion di Buceo, y Peter tambe a reconoci Enrique pa 31 aña di buceamento. Contrata pa Peter como un maestro di buceo local, Enrique, kende ainda ta biba den e bario di Rincon, ta famoso pa e hecho cu semper e ta busca e turtuganan y zeepaardnan pa su clientenan wak.

Pa mas informacion tocante Peter Hughes, bishita www.galapagossky.com y e Dive Encounters Alliance.