Palm Beach - Denise Leinhardt ta bishita e isla regularmente, acompaña pa su casa Julian y nan dos yiu muhenan Samantha,13 y Carli, 11.

Nan ta biniendo e isla hunto como un famia tur zomer ya pa 12 aña, y ta pasa seis of shete, y tin biaha hasta ocho siman akinan, como tambe un siman durante e lunanan di winter. Den transcurso di e añanan e famia a crea hopi bunita amistad cu e Arubianonan akinan, y nan a bira bon amigonan cu hopi di e hendenan cu ta traha of disfrutando di nan vakantie riba e playanan.

E famia su lasonan cu Aruba a bira mas fuerte ainda aña pasa, ora cu hunto nan a dicidi pa habri nan cas na Merca pa Gregory Richardson, un hoben Arubiano cu nan a conoce riba e playa. Greg a haci un impresion y a toca e curaconnan di e miembronan di famia, Denise ta splica, cu su storia y lucha personal pa sostene y educa su mes, mientras cu el a sobresali den e ramo di deporte, specialmente futbol, y trahando full time.

Naci den e bario di Noord, Greg a biba cu su famia te ora cu su mama a bira malo, ora Greg tabatin solamente ocho aña di edad. Como un mucha sensitivo, sensitivo y lief, Greg su bida kisas no tabata facil durante e añanan aki, bibando cu diferente miembronan di famia y cambiando di scolnan, bayendo Corsow, y finalmente regresando Aruba riba su mes, despues di a basicamente lanta su mes for di e edad di 12 aña.

Despues di a gradua di scol, Greg a cuminsa traha riba playa y a hunga futbol pa e ekipo local di Deportivo Nacional na Palm Beach. El a hunga futbol henter su bida, pero el a cuminsa pensa seriamente tocante e deporte ora cu e tabata biba na Corsow.

Denise ta corda cu nan tur a pasa hopi dushi riba playa cada zomer ora cu Greg semper por a ser mira cu su bala di futbol, bailando rond y entrenando entre su oranan di trabou. E famia a simplemente enamora cu Greg, y a dicidi na augustus di 2011 pa invita Greg pa bin Merca y registr’e den un academia di futbol. “E no tabata facil tur ora durante e ultimo 10 lunanan akinan,” Denise ta raporta, “pero e tabata bal cada seconde, sabiendo cu nos a yuda haci su soño un realidad.”

Greg actualmente ta hungando pa e United States Soccer League PDL/Schultz Academy y ta wardando pa wordo poni den un ekipo permanente. Schulz Academy, un top academia di futbol hubenil cu tin su facilidad principal na Boca Raton, Florida, awo ta conta cu un hungador talentoso di Aruba cu ta move lihe riba su pianan, entre su studiantenan, y e coachnan ta yama e cas riba un base regular. “Nos tur sa cu e ta bayendo leu den su carera y nos no por ta mas orguyoso di dje,” Denise ta comparti.

Aki por mira e famia hunto cu Greg.