Oranjestad – Aunke Willy Martilia y Minister Michelle Hooyboer-Winklaar no ta famia, nan tin un lazo di amistad hopi special, unda te hasta manera ta custumbra entre amigonan na Aruba, e mandatario a crece ta yama sr. Martilia como “Uncle Willy”. Diaranson ultimo tabata un momento hopi special pa famia Martilia, unda cu casa di Uncle Willy, sra. Edna a organisa un mainta anima pa celebra cu Uncle Willy a cumpli 80 aña. Esaki tabata un celebracion cu Minister Hooyboer-Winklaar no por a falta y el a disfruta di topa cu Uncle Willy, sra. Edna y tur su amigonan na Centro di Cuido San Nicolas, unda cu Uncle Willly ta hospeda. E amistad entre e famianan Martilia y Winklaar ta di hopi aña. Nan tabata conoce otro na Aruba, pero e amistad y cariño a bira mas grandi ora cu nan a topa bek na Canada unda tur dos famia a biba pa basta aña. Minister Michelle Hooyboer-Winklaar y Uncle Willy a disfruta un momento durante e celebracion compartiendo y cordando algun anecdota masha leuk. E re encuentro entre miembronan di tur dos famia semper ta hopi ameno. Na e ocasion di e hacimento di aña di Uncle Willy, Robert Maduro tabata presente pa anima tur hende cu bon musica y sra. Edna no por a laga afo un catering bon prepara pa tur hende gosa y pasa hopi bon. Tabata un dia memorabel pa tur hende. Minister Michelle Hooyboer-Winklaar ta desea Uncle Willy hopi salud, hopi amor y alegria.