Oranjestad – Minister Michelle Hooyboer-Winklaar, encarga cu maneho di cultura di nos pais, ta hopi satisfecho cu porfin e ley a keda cla cu ta duna descripcion oficial y detaya di colornan di nos bandera. E ley lo wordo traduci na Papiamento y na Ingles y lo wordo reparti pa publico y specialmente pa e empresanan cu ta diseña, imprimi, bestel of bende bandera.

Pa motibo cu na Nacionnan Uni mes cierto colornan a cambia, a toca e blauw di e bandera di Aruba tambe pa wordo cambia. Awor den e decreto oficial tin e color describi exacto y ta obligatorio pa uza e colornan manera e ley ta bisa. Den futuro cercano lo tin sancion pa esunnan cu ta viola e ley di bandera di Aruba uzando otro color cu no ta esunnan cu ta para den ley.

E mesun "landsverordening" aki ta papia tambe di e 4 simbolonan nacional, esta himno, bandera, escudo y shoco. Minister Hooyboer-Winklaar ta hopi contento cu nos shoco como simbolo nacional nobo, awor ta hancra den ley tambe.