Aña escolar a finalisa. Studiantenan y tur maestro a drenta temporada di vacacion, mientras cu beursalen ta den pleno preparacion pa nan biahe pa entre otro Hulanda. Como mayor responsabel cu ta stima su yiu y ta orguyoso di su graduacion, mi no por simplemente laga loke a pasa riba su anochi di graduacion keda sin wordo comparti y bay cu biento.

Diadomingo 1 di juli 2012 a tuma lugar ‘Diploma uitreiking’ pa studiantenan  di ‘Avond HAVO’ Colegio Arubano. Un anochi anticipa pa bira grandi, bunita y yen di emocion pa celebra e logro di mi prome yiu ta resulta den un anochi di desapunto amargo pa mi famia. Ami ta cataloga e anochi como un fracaso pa esnan cu a organisa esaki.

Na entrada di e ballroom di Hyatt Hotel, e alumno graduado y su famia a keda confronta cu e realidad cu solamente dos persona mas por a drenta cun’e pa presencia su graduacion. Si un famia tabata consisti di mas persona, esakinan a keda prohibi pa drenta manera den mi caso, cu mi a hiba tambe mi yiu muher. E momento tabata di un decepcion masha grandi y mas aun un berguensa con juffrouw van Loon na porta tabata para tur hende y den un forma arogante y hopi ‘brutaal’ tabata papia cu e mayornan. No ami so, pero mas mayor a keda dirigi di un forma hopi bruto, cual a pone cu ningun di nos a drenta e sala tampoco. Y esaki a pasa cu mas mayor cu finalmente a hasi mescos cu nos, keda para pafor. Nos tabata dispuesto pa te hasta paga pa drenta pa por presencia graduacion di nos yiu, pero lamentablemente esaki a keda nenga na nos. Famianan cu a keda para pafo como protesta, a ripara cu toch a laga otronan drenta cu cuater persona. Esaki tabata absolutamente desaprobabel.

Mi yiu cu a gradua tambe a keda para pafo hunto cu nos y solamente a drenta ora su turno a yega pa bay tuma su diploma. Unta pika? Ni un potret di recuerdo cu su famia, riba e anochi bunita di su graduacion no tabata posibel. Ki berguensa, un desapunto total e anochi aki tabata.

Mi a compronde cu tabata tin mayor cu a tuma contacto cu cabesante di ‘Avond HAVO’ meneer Mulder pa averigua si mas cu dos persona por a asisti na e anochi y e contesta tabata cu “si ta posibel”. Pero na final e berdad a resulta otro manera cu ya caba mi a conta.

Den mi disgusto mi a laga sa na e juffrouw cu mi ta bay prensa local pa publica e ‘berguensa aki’. No ta manera pa trata graduadonan di ‘Avond HAVO’ y nan famia. Mi yiu ta un hoben cu pa motibo di no a haya cupo den ‘dag HAVO’ a dicidi pa sigui anochi y ta finalisa esaki sin ripiti aña. Pues un orguyo p’e y tambe pa ami como mayor. No por discrimina di e manera aki.

Si school (‘Avond HAVO’) sigui organisa tipo di evento asina, ta mihor pon’e na school mes y duna e graduado su diploma y laga nan bay cas. Sino organis’e di e forma cu Colegio Arubano den dia ta hasi pa su graduadonan. Ta bende ticket pa entrada y laga e famia dicidi cuanto persona di e famia ta asisti y ta cumpra ticket pa e ocasion, di e forma cu e ta bira un anochi inolvidabel y ta celebra logro di e graduado.

Mi ta finalisa y ta spera cu esaki por yega na oido di e cabesante y tur cu ta organisa graduacion di studiantenan di ‘Avond HAVO’, pa e tipo di berguensa aki no mester ripiti y laga un sabor amargo atras.