Oranjestad - Manera ja por a lesa siman pasa caba Hendrick Burgers ta un hoben Arubiano practicante di kite surfing cu e aña aki un bes mas a competi den Aruba Hi-Winds.

Hendrick a cuminsa kite surf cinco aña pasa na Republica Dominicana y practicamente for di e tempo ey ela enamora cu e deporte aki. Su amor pa kite surf ta asina grandi cu tur dia e ta train y ta den awa dos ora minimo.

Siman pasa durante Aruba hi-Winds 2012 un baha mas Hendrick a buta un stempel y a reconfirma cu e ta talento cu pronto hopi hende lo sa mas di dje.

Despues cu e prome dia a wordo cancela paso no tabata tin biento, Hendrick a sali duro e ultimo dia nan di Aruba Hi-Winds. Aki e mester a lucha contra competidornan di nivel mundial di entre otro Venezuela y Boneiro.

E competencia tabata un sumamente preta pero asina aki mes Hendrick a logra sobre sali cu un di cuater puesto den categoria free style profesional y un tercer puesto den long distance professional.

Hendrick Burgers ta un talento cu Aruba lo bai tende hopi mas di dje den futuro. Pa sa mas di nos talento Arubiano aki por subi www.hb-kiteboarding.webss.com.