Pa prepara y ehecuta e proyecto di organisa un exposicion tocante e culturanan Amerindio di Caribe Hulandes recientemente a oficialisa ‘Fundacion 1403’. E nomber di e fundacion ta inspira riba un di e numbernan di e serie di artefactonan di Aruba cu tin den Museo di Volkenkunde na Leiden, Hulanda. E artefactonan aki a ser colecta na final di siglo 19 door di Pater van Koolwijk. E tawata e prome persona cu a duna e obhetonan perteneciente na e herencia arkeologico di Aruba un balor universal door di reconoce cu nan merece wordo studia, cuida, presenta na un publico amplio y warda pa siguiente generacionnan por disfruta di nan.

E meta di Fundacion 1403 ta encera studia y mustra e.o. e coleccion aki den e contexto di e culturanan den e resto di Caribe Hulandes y regio. E idea ta pa organisa un exposicion cu lo por biaha entre Hulanda y Caribe. Pa prepara e proyecto aki a papia durante e ultimo lunanan cu varios partner den Reino y den regio.

Pa yega na un plan concreto a invita e partnernan principal pa un ‘Think-tank’ aki na Aruba na final di october proximo. E idea ta pa e representantenan di Museo di Volkenkunde, Museo di Oro di Bogota, Cuba, Puerto Rico, demas islanan di Caribe Hulandes y Aruba reuni pa hunto formula un ‘projectdossier’. Pa e ‘Think-tank’ aki a haya sosten caba di ‘Mondriaanfonds’ kende ta financia esaki for di e presupuesto cu nan tin pa promove idea inovativo y ambicioso cu tin potencial pa concretisa den proyecto exitoso.

E directiva di Fundacion 1403 ta consisti di Sr. Eduard Drescher como presidente, Sra. Arminda Franken – Ruiz, secretario, Sra. Julie Thode, tesorero y como miembronan Sra. Chanin Boekhoudt y Sr. Herman Hek. E miembronan di directiva ta voluntario y entusiasma pa traha riba e proyecto aki hunto cu Museo Arqueologico Aruba cu aprobacion di e Minister encarga cu cultura.