Dialuna 16 de juli 2012 durante e reunion di Mando Policial dos colega a wordo invita pa di e manera ey despedi oficialmente di nan. E dos coleganan aki ta retira di Cuerpo Policial pa persigui un otro reto.

Sra. Golda Candelaria-Davelaar, Inspector Primera Clase ta bay di e organizacion pa bay biba na hermana isla Corsou. Su casa ta bay ocupa un funcion na un empresa priva eynan y su famia ta muda bay cune. Sra. Candelaria-Davelaar su ultimo funcion tawata coordinadora di e “Bureau Integriteit & Veiligheid (BIV)” antes mihor conoci como BIZO.

Sr. Ronny Geerman, Inspector Primera Clase ta bay di e organizacion pa ocupa un otro funcion den gobierno. Sr. Geerman ta bay traha como Director na Cuerpo Especial Arubano (CEA). Su ultimo funcion tawata Districtchef interino na e Districto San Nicolas.

Sr. Richardson, Hefe di Polis a gradici e dos coleganan pa e trabou y nan dedicacion na e bienestar di Cuerpo Policial. E la papia repasando e carera di cada un di nan y a desea nan hopi exito cu e retonan nobo.
Ambos colega tambe a hiba palabra y a repasa algun momento di nan periodo na e organizacion.