Oranjestad -  Recientemente e organisacion “We Love Students”, cu ta trahando na bienestar di studiantenan Arubiano den exterior a hasi un caminata cu nos Minister President, Mike Eman.WLS ta un organisacion cu a wordo funda cu e intencion pa crea oportunidadnan pa studiantenan riba diferente tereno entre otro riba tereno educativo, deportivo, festivo y caricativo. WLS ta un plataforma pa yuda studiante nan yega na haya informacion di trabou nan, stage etc. cu tin disponible.

Na tur e studiante nan cu ta bay biba afor ta naturalmente necesario pa haya un lugar pa asina nan por establece nan mes y aki WLS ta disponible pa yuda studiante nan cu ainda no tin un cas pa yega na esaki. WLS ta purba di eherce e studiante nan CV door di stimulanan pa hasi diferente actividadnan curicular. WLS ta brinda servicionan di mercadeo na companianan pa asina por funda e organisacion cu por cierto tambe ta ofrece plataforma di studiante cu lo por logra completa projectonan riba diferente tereno.

WLS ta hopi activo participando na KIKA Run, cual ta un maraton pa muchanan cu cancer, organizando un campaña unda studiantenan por a duna nan pañanan cu ja nan no ta hasi uzo dje na un organisacion Humana pa asina yuda muchanan na Africa. Tambe WLS ta participa na diferente actividadnan deportivo. Na final di september WLS lo ta organizando e “14de softbal toernooi” pa tur e Arubianonan bibando na Hulanda, e evento aki lo tuma lugar na Den Haag unda cu cada stad ta forma nan team di hendenan Arubiano biba na Hulanda. Y unda cu e teamnan lo competi dos dia largo pa asina saka un team y pues stad campeon.

Diabierna otro siman, dia 3 di augustus 2012 WLS lo ta organizando un “Executive Friday” cu “Cocktails & Desserts” pa tur studiantenan riba 18 aña di edad bibando den exterior of ta bayendo biba den exterior y tambe pa tur e profesionalnan jong na Aruba. Esnan cu ta sinti nan mes jong ainda tambe ta bon bini. E evento aki lo tuma lugar na Universidad di Aruba pa 7or te cu 10or di anochi. Lo tin musica di Nutzbeatz di Aruba y Dj Double R for di Hulanda riba e equiponan di sonido di Elite Productions. E contribucion lo ta $30,- of Afl. 50,- pa persona. Esaki ta e oportunidad ideal pa e comunidad di hobennan studiante y trahador pa por topa otro.

Nos ta invita tur studiante y profesional nan pa bin habri weekend cu WLS. Pa reserva ticket contact representantenan di WLS Gilliany na 5601651, Marylin na 5945959 of Joseandro na 5680656. Tambe por bishita WLS su website na www.welovestudents.org of manda un e-mail info@welovestudents.org.