Riba diahuebs 2 di augustus 2012 parti mainta miembronan di e brigada motoriza di Cuerpo Policial Aruba a ricibi un training avansa di un polis di Estados Unidos cu ta sr. Allan Attanasio.

Sr. Attanasio ta miembro di e Mountainside Police Department na New Jersey U.S.A. y a bini un aña pasa y duna un training avansa na miembronan di Cuerpo Policial pa upgrade nan nivel di uzo di Motorcycle durante trabou di polis. E aña aki sr. Attanasio a bin Aruba como turista cu su famia. Como cu e contacto cu e polisnan local tabata asina bon, a desaroya un relacion personal cu nan y dicidi di bin wak con nan a sigui practica nan tecnica di maneho. Ela hasta sacrifica un dia di su vakantie pa duna nan algun training mas avansa, completamente gratis.

Sr. Ricardo Muller y sr. Robert Kock di Cuerpo Policial a gradici sr. Attanasio sinceramente pa esaki y a presente un regalito oficial di Cuerpo Policial Aruba pa su gesto.

Riba e imagennan por mira algun potret di e entrenamentonan.

Importante pa publico ta tambe loke sr. Attanasio a splica relaciona cu tecnicanan di maneho pa motorcycle.

Ela splica cu hopi manehador no ta conciente di cu algun skills nan basico di maneho por evita hopi accidente of minimiza e danjo durante esaki of hasta salba bida. Por ehempel ela menciona cu hopi manehador di motorcycle ta custumbra di usa e brake patrtas so ya cu nan tin miedo cu e brake dilanto lo por pone nan perde control facil y no ta para e motorcycle toch. Ela splika cu mayoria porcentahe di e braking power ta sinta den e wiel dilanti si bo sa con pa use apropiadamente. Ela splika cu e mihor manera pa evita accidente y minimiza e danjo durante accidente cu motorcycle ta sinta den sinja usa tur dos brake pa para na tempo of pa baha e speed mas posibel pa e impacto ta hopi menos fuerte. Segun ela splika cu si tur manehador di motorcycle tabata por esaki lo tabatin hopi menos morto den trafico cu motorcycle y hopi menos danjo fysico.

Un otro cos importante cu ela splika ta e motibo pakico hopi chauffeur di auto no ta wak motorcycle. E tin di haber cu e tamanjo hopi mas chiquito y smal di e motorcycle (compara cu un auto) y e hecho cu hopi chauffeur di auto no ta busca motorcycle (mentalmente) of no ta verwacht nan riba caminda. Esaki ta pone cu manehadornan mester hasi nan mes y nan motorcycle mas visibel cu ta posibel (luz, reflector, colornan neon bibo, etc.) y mester sinja maneha defensivo y sinja kita constantemente pa auto cu no ta wak nan of ta sali nan dilanti.

Bon tecnicanan di desviacion tambe por scapa bo bida.

Tur esaki y hopi mas tecnicanan specialisa pa trabou di polis, a wordo trata cu e brigada motoriza durante e entrenamento.

http://www.youtube.com/watch?v=rcRvLdrqiFU&feature=youtu.be