Palo Marga - Diabierna for di oranan tempran di anochi coredornan di auto, brommer y scooter a cuminsa yega na gran cantidad na e pista di Palo Marga pa asina participa den e evento di Street Legal. Manera ta conoci e ultimo actividad di street legal pa motibonan fuera di alcanse di e organisadornan mester a wordo para aunke esaki ta algo cu nan no ta desea di haci constantemente como cu cada biaha cu para e caredanan di Street Legal na Palo Marga esaki ta resulta den caredanan illegal riba camindanan publico cu por tin su consequencianan.

Diabierna pa compensa e situacion di caredanan cu a keda cancela e organisadornan a dicidi di core tur e categorianan di Street Legal esta Street Legal Auto, Brommer, Scooter, Ladies Cup y King of the Street, y por a mira cu e acogida tabata grandi cu filanan di auto cu tabata sali te pafor di e staging area y drenta e pit area. E programa a cana bon te ora cu a presenta algun problema cu e sistema di computer cual a pone cu e actividad a caba un basta laat.

E ganadornan di e anochi a keda como lo siguiente:

Ladies Cup:
1. Jessica Werleman
2. Yaya Simon

Street Legal Car:
1. Derryl Wester
2. Jonovan Rosel

Street Legal Bike:
1. Luigene Eduarda
2. Benjamin Jones

King of the Street:
1. Elton Tromp
2. Steven Geerman

Scooter:
1. Igor Alberto
2. Raymond Tromp

Mester remarca cu dos coredor cu a sobresali den e actividad aki tabata Steven Geerman den auto y Igor Alberto den brommer, ambos coredor a core den dos diferente categoria. Den categoria auto Steven Geerman a core den Street Legal auto unda e la titula su mes como subcampeon y e la core tambe den e categoria King of the Sstreet unda e la sa di yega den e round prome cu semi final. Den e categoria Brommer nos ta hanja Igor Alberto cu a yega te den e semi final y tambe e la core den e categoria Scooter unda e la bira campeon na e parti final.

Pues di e forma aki nos por wak cu e coredornan tin gana di core y ta purba tene nan mes activo na un manera legal y organisa riba Palo Marga na lugar di bai core caredanan clandestino poniendo nan bida y di otronan den peligro. E siguiente actividad di Street Legal ta programa pa tuma lugar diasabra 18 di augustus proximo.