Palo Marga - Deporte di motor ta uno cu ta requeri hopi reglanan di seguridad pa asina e wordo practica na un manera responsabel, ta bon conoci cu pa casi 30 aña caba e pista di Palo Marga ta cumpli cu tur requisitonan local y internacional pa asina por practica deportenan di velocidad halto na un manera reglamenta y responsabel. Pa algun aña caba e facilidadnan aki cu ta pertenece na Gobierno di Aruba ta wordo maneha pa The Boss Racing Foundation kendenan ta haci nan maximo esfuerso pa asina mantene e facilidadnan cu ta ubica den un zona unda saltpeter di lama ta haci bastante danjo na tur loque tin den e facilidad deportivo aki. Deporte di drag ta un deporte cu ta atrae bastante turista henter aña tanto esnan cu ta bin participa for di exterior pero tambe ultimamente Aruba ta hanjando bastante bishitante for di Merca kendenan a tende cu na Aruba tin Drag Race via di e propaganda grandi cu e hoben Trevor Eman y Team Aruba ta haciendo na Merca. Pero pa stranjo cu e por zona despues di casi 30 aña Palo Marga ta coriendo cu un timing system cu asina bieuw cu na Merca mes actualmente casi bo no por hanja piesa mas pe. E anja aki e systema aki a cuminsa duna bastante dolor di cabes y e fundacion cu actualmente ta manehando e pista tin biaha ta hanjanan ta paga mas placa pa piesa cu si nan cumpra un computer nobo pa e simpel hecho cu e piesanan bo no ta hanjanan asina facil a pone cu nan prijs a bira sumamente halto. Pa motibo di e timing system aki cu a hanja un problema bastante serio algun siman atras y no por a hanja piesa mes ora caredanan di street legal mester a wordo cancela, pero na momento cu nan a cancela riba Palo Marga nan a continua riba camindanan publico cual ta hinca e coredornan pero tambe ussuarionan di careteranan publico den peliger. Tambe e pickupnan di safety safari cu mester percura pa e parti seguridad y duna assistencia den un caso di emergencia ta den un situacion deplorabel te cu a bai asina leeuw cu nan no por wordo usa mas paso luga di duna assistencia nan a bira un peliger. E fin di luna aki Palo Marga lo ta escenario un biaha mas di un careda international y ya caba tin various hotel na Aruba cu a cuminsa sinti e efecto di e bookingnan di participantenan di venezuela y Corsow cu ta biniendo pa participa pero tambe di nan fanaticonan cu ta biniendo pa apoya e coredornan di nan pais. Pero na Palo Marga esnan encarga cu e pista ainda no a hanja un contesta for di gobierno di Aruba kende ta donjo di e pista si nan lo por hanja e judansa necesario pa por pone tur e equiponan disponibel pa asina e caredanan por continua. A acerca tambe e fundacion lotto pa deporte cu ta encarga cu facilidadnan deportivo pero eynan tampoco no a hanja un contesta pa asina por adqueri e equiponan necesario cu ta cla caba pa sali pa Aruba pendiente di e pagonan necesario. Ban spera cu pronto gobierno y e ministernan concerni lo por pone e fondonan disponibel pa asina e equiponan necesario por wordo cumpra pa asina garantisa continuidad y seguridad di tur esnan cu ta practica e deporte di velocidad riba Palo Marga.