Concord, N.C. - Despues cu siman pasa tabata basta druk cu test y dos (2) display, Team Aruba a sali pa e di nuebe (9) careda di ADRL pe aña aki. Apesar di e calor imenso na North Carolina hopi fanatico di Drag a presenta na zMax durante weekend ultimo. Pa Team Aruba e calor no tabata e problema mas grandi pero e diferente combinacion cu nan a haci pa asina saca lo maximo di nan Exteme Pro Stock Ford Mustang. Esaki no a preveni cu Team Aruba tabata tin un “tire-shake” pisa diabierna anochi durante nan ultimo run pa qualificacion ora cu temperatura e condicionan di pista tabata mas faborable pa core un bon tempo. Asina mes Team Aruba a logra qualifica pa eliminacion como e di 15 auto cu un tempo di 4.154. E “field” completo di 16 auto cu a qualifica tabata separa pa menos di 0.06 seconde. Esaki a haci cu tur hende lo por a gana e careda di weekend pasa na zMax.

Den prome rond di eliminacion tur e auto den categoria Extreme Pro Stock a experencia “tire shake” y Team Aruba tambe a confronta esaki pero asina mes Team Aruba a yega final prome pa asina gana Doug Kirk cu a qualifica como nr 2 pa eliminacion. Pero e mas duro tabata ora cu a realisa cu e careda aki a costa Team Aruba nan motor di Kaase ora esaki a rementa. Esaki a haci cu Team Aruba mester a actua liher ora nan a drenta pit back pa cambia esaki. Cu yudansa di John Kaase mes Team Aruba a logra cambia e motor pa asina bai pe di dos (2) round di eliminacion contra di Brian Gahm. Team Aruba y Gahm a sali hunto pero na final Grahm a logra bai cu e victoria.

“Mi ta hopi orguyuso di nos team,” Trevor Eman a comenta “Nos a traha duro henter siman pa bin bon prepara pe caredanan aki. Aunque nos a cai afor den quarto di final mi ta orguyoso cu nos team a sera cabes y a buta tur di nan banda pa cambia e motor pa asina nos por a sali pusta. Esaki ta prome biaha cu nos mester a cambia motor mey mey di un round di eliminacion y nan a haci un tremendo trabow. Mi ta aprecia cu John Kaase mes y e team di Pluchino a bin duna nos un man tambe. Esaki ta mustra cu e e famia di Pro Extreme Pro Stock di ADRL ta un famia grandi!”

“Apesar di a traha duro henter siman y rementa motor, e siman y weekend tabata uno cu nunca nos lo lubida. Nos a pusta pa prome bes na e pista mas grandi y moderno di mundo di Dragrace cu ta zMax, nos tabata riba un tour unda cu nos a cuminsa e siman ta test y presenta nos mes na nos fanatico nan di Union cu ta nos cas for di cas, nos a core bai haci dos (2) display pa nos sponsor y al final nos a haya e sorpresa grandi di por tabata tin nos Minister Presidente Mike Eman hunto cu nos Minister di Finanzas, Communication y Energia Sr. Mike de Meza na pista durante e weekend ultimo. Esaki tabata e prome biaha cu representantenan di Aruba por a mira cu nan mes wowo kiko tur nos ta haci y pa nos tabata un placer di tabata tin nan aki.”

“Mi a keda impresiona di con grandi Dragrace ta na Merca” Minister Presidente Mike Eman a commenta, “pero mas aun mi a keda impresiona cu organisacion tras di Team Aruba. E caredanan di ADRL ta grandi y Team Aruba ta haci un tremendo trabow pa representa y promove nos isla. Loke nan a logra te cu awor ta inspira nos tur sea cu nan perde of gana. Mi ta sigur cu nan lo sigi cu e bon trabow cu nan ta hacienda awo.”

“Bo mira e siman cu a pasa e tabata uno cu hopi emocion balansa entre experencianan bon y malo” Trevor a continua. “Awor nos mester sigui focus y sigui traha duro pa logra yega unda nos kier yega y esey ta pa bira Campeon Mundial pero alabes promove nos dushi isla Aruba!”

Pa keda na altura di tur movicion di Team Aruba bishita nan fanpage www.facebook.com/teamarubaracing of awor tambe nan Twitterpage - @TeamArubaRacing unda bo lo tin resultado di caredanan, evenementonan cu Team Aruba ta atende, video y diferente potretnan. Naturalmente bo por laga bo comentario y tambe bo apoyo pa Team Aruba!