Santa Cruz Rockets Organization ta anuncia cu e temporada di Baseball ta sigui y cu nos ta cla pa cuminsa bek cu e training despues di un vakantie bon mereci.

Pa tur nos basebolistanan di categoria 7-8, 9-10 y 11-12 e training lo sigui normal cuminsando dialuna awo 13 di augustus riba veld di Rockets na Santa Cruz. Nos ta pidi pa mayornan tene bon nota di esaki y pa trese e muchanan na veld pa asina training por cuminsa pa 5or di atardi.

Tambe Rockets ta anuncia cu ta bai tin oportunidad pa basebolistanan entre edad di 13-14 anja pa forma parti di Rockets. Mayornan y basebolistanan cu ta interesa pa forma parti di e team dinamico, grandi y serio di Rockets por pasa libremente na veld di Rockets pa asina busca mas informacion y inscribi.

No solamente pa e categoria aki por pasa na veld. Basebolistanan entre edad di 5-10 aña cu kier siña Baseball, hunga Baseball y forma parti di e team grandi di Rockets por pasa libremente na veld pa asina haña mas informacion di esaki. Tene na cuenta cu e veld di Rockets ta situa riba e caminda grandi di Santa Cruz, e veld grandi cu ta keda pariba di Botica Central.

Santa Cruz Rockets Organization kier a gradici tur nan miembronan, mayornan, fanaticonan y Aruba en general pa e apoyo y sosten ricibi y nos ta spera di por sigui conta cu esaki indefinitivamente. Pa kita duda na rumornan falso cu ta core rond, Santa Cruz Rockets Organization ta den full swing cu preparacionnan y ta keto bai riba pia trahando pa nos futuro basebolistanan di Aruba. Rockets ta un team hopi dinamico, jong, serio, transparente, profesional y cu hopi gana pa sigui traha na bienestar di nos muchanan cu ta e future di mañan.

Asina ta mayornan tene bon cuenta di esaki y corda tuma e miho decision pa boso yiunan y confia nan den man di hendenan responsabel y serio pa asina boso yiunan por bira basebolistanan disciplina y cu amor pa baseball.

Nos ta topa dialuna awo 13 di augustus na veld di Rockets situa pariba di Botica Central riba caminda grandi di Santa Cruz.