Diasabra anochi Lucho Werleman representante di The Boss Racing Foundation a biaha pa Corsow unda nan a tene un reunion cu e coredornan na "Because Entertainment" riba Gosieweg, akinan a presenta e programa official di One Cool Summer 2012 conhuntamente cu e premionan cu lo wordo paga pa e careda aki. E coredornan a mustra interes pa e careda aunque e invitacion a jega laat pero tur hende tabata pendiente pa basta tempo caba pa e careda aki cu ta aparece riba e calendario official di Palo Marga 2012. E representante di The Boss a mustra esnan presente e categorianan cu lo wordo cori y a splica tambe e deal di container pa esnan cu kier bin participa na e caredanan. One Cool Summer lo tuma lugar dianan 30 y 31 di Augustus y e finalanan dia 1 di September proximo y e careda aki lo conta cu un premiacion den cash di mas di 18 mil florin en total cual ta haciele hopi atractivo pa e coredornan, sin laga afor cu e ta wordo organisa pa The Boss kende tin un bon record di a cumpli cu e premiacionan priminti. Na final di e anochi a jega na un semi understanding over di e gastonan y pronto lo por cuminsa anuncia e nombernan di e autonan y participantenan di Corsow cu lo ta participando na e One Cool Summer National cual careda por cierto tambe ta valido pa e Mio Wireless Point Series y e biaha aki e coredornan cu gana mas round den IHRA Summit Series Box y No Box lo hanja tambe un IHRA Iron Man cual ta algo sigur unico. Den e proximo dianan lo ta anunciando tambe e lugar y e atracionan special cu lo tin e aña aki pa e inscripcion di e careda aki cual ta programa pa Dialuna 27 di Augustus.