Tur bario por traha nan grupo pa e wega di Dodgeball. “Dodgeball” ta un wega parecido na e trefbal cu nos conose (antes yama “E wega di Dood”) pero riba e cancha lo conta cu seis(6) bala pareu.

Tabata algun tempo pasa cu den Centro di Bario Brazil a forma algun grupo pa hunga e wega “Dodgeball”. A base di peticion general, gruponan a cuminsa reta otro caba pa bin bek cu e wega aki. E hobennan di Brazil a bisa cu nan ta cla debi cu nan tabata tin hopi plan y strategia di wega, (pero nada di training). Mientras cu e hungadornan di Mabon tin varios tempo den preparacion caba.

Diadomingo dia 26 di augustus pa 5:00 pm, ta cuminsa e wega di “Dodgeball” pa hende grandi, esaki despues di un warm-up di weganan di trefbal pa mucha. Dodgeball ta un wega hopi gusta na Merca y te hasta pelicula a traha di dje. Aki na Aruba e wega aki no ta wordo hunga oficialmente ainda cu excepcion di algun tempo atras cu e mesun hobennan di bario Brazil a duna e trahadornan di IDEFRE un les formal. Cu otro palabra un “sota mahos”.

Tur grupo di bario cu ta interesa pa hunga e wega di “Dodgeball” , traha nan team di 10 participante masculino of femenino y tuma contacto cu Centro di Bario Brazil na tel. 584-6500.