Diadomingo benidero e seleccion nacional di ajedrez Abierto y Femenino lo sali rumbo pa Istanbul, Turkia, pa participa n’e di 40 Olimpiada Mundial di Ajedrez unda mas di 1500 ajedresista di mas di 160 pais lo participa. E Olimpiada lo cuminsa dia 27 di augustus y lo dura te dia 10 di september. Un total di 11 buelta lo ser hunga (un buelta pa dia) y lo tin dos dia di descanso.

Cada dos aña e mihor ajedresistanan di mundo ta midi forsa cu otro durante dos siman den e evento mas grandi di ajedrez riba nivel mundial. Esaki ta di 6 biaha cu Aruba lo participa cu un seleccion abierto (Jugoslavia 2002, Mallorca 2004, Italia 2006, Alemania 2008 y Rusia 2010) y di 3 biaha cu un seleccion femenino (Alemania 2008 y Rusia 2010).

Aunque nos ta un pais chikito, e ultimo decada ajedrez a desaroya hopi na Aruba y n’e ultimo 3 olimpiadanan cada biaha a mehora nos resultadonan. Tambe n’e olimpiadanan tres ajedrecista Arubano masculino a haya titulo internacional di Candidate Master (Raymundo Dijkhoff, Juste Lopez y Ahmid Juddan) y e unico hungador femenino cu a logra un titulo, Claudia Carrero, a haya e titulo di Woman Candidate Master.

E aña aki diferente di e integrantenan di e dos seleccionnan nacional a participa na torneonan internacional manera n’e Subzonal (Ecuador), Panamericano U-20 (Brazil), Curacao Chess Festival (Corsou) y Panamericano U-16 (Peru) y e resultadonan ta mehorando cada biaha unda nos pais ta demonstrando cu den ajedrez nos tambe ta conta.

E seleccion Abierto ta consisti di ir. CM Octavio Croes, Jose “Chelo” Pesqueira, Juan Pablo de Mey, Quintin van der Seijp y drs. Enrique Jacopucci, mientras cu Rigo Tromp lo ta capitan. E seleccion femenino ta consisti di Manuelle Dania, WCM Claudia Carrero, Annelaine Jacobs y Maria Paula de Mey, mientras drs. CM Raymundo Dijkhoff lo fungi como capitan.

Ta hopi remarcabel cu di e 9 hungadornan, 5 ta hungador hubenil (bou di 20 aña), demostrando cu e deporte di ajedrez ta creciendo bou nos hubentud, locual ta indica cu ajedrez tin hopi futuro na Aruba.

Aunque mayoria hungador a cubri gasto a titulo personal, mester agradeci especialmente e ayudo financiero obteni pa Gobierno di Aruba, especialmente Minister Visser, Aruba Bank y Federashon di Ajedrez di Aruba. Esakinan hunto a logra di cubri gasto di ticket, ya cu gastonan di estadia, cuminda y transporte semper ta ser cubri pa e pais organizador.

Directiva di Federashon di Ajedrez di Aruba ta desea su seleccionnan nacional hopi exito na Turkia y ta invita tur interesado pa sigui e Olimpiada Mundial riba e website http://www.chessolympiadistanbul.com/