Relaciona cu e estadistica di polis mi por ta hopi cortico. Cuerpo Policial ta registra asistencia, incidente y casonan cu ta bin na conocemento di polis. E datonan aki ta ser registra den e sistema di registracion di polis. Den practica sa resulta cu datonan sa wordo registra dobel of robes. Door di esaki actualmente no ta posibel pa genera informacion estadistico 100% corecto. Pa e rason aki KPA ta bezig pa basta tempo caba pa drecha e sistema di registracion pa asina den futuro cercano por  suministra informacion estadistico interpretabel.

E datonan cu KPA a suministra na CBS ta di 2010 y no ta regarda informacion rafina. For di e datonan aki ta sali afo cu tin un aumento di e cantidad di registracion. For di esaki no por conclui sin mas si cu criminalidad (pa locual ta trata volume) a aumenta. Un aumento di e cantidad di registracion tambe por wordo declara door di e disponibilidad di e cuidadano pa haci denuncia y notifica polis, door un maneho di cero tolerancia, door di accion dirigi y intensivo di polis y/of door di registracion dobel den e sistema di polis.

Den caso di haci comparacion di estadistica di polis den tempo mester percura pa compara appel cu appel y no appel cu peer. Si esaki no wordo haci claramente un impression por wordo crea cu e no ta cuadra cu realidad.

Locual mi kier bisa ta cu cifranan di criminalidad nunca ta para riba nan mes. Semper nan mester wordo mira den un contexto social, pa por duna declaracion responsabel.