E careda di 10K di Turibana pa Santa Cruz, ta un di esnan mas grandi durante aña na cual ta participa un gran cantidad di coredo y tambe canado. Bunita y emocionante ta pa mira na inicio diadomingo mainta prome cu e careda e cantidad di deportista y atletanan, para cla pa scucha e ‘tiro di salida’ pa asina nan cuminsa core of cana pa e careda di dia.

Premiacion pa coredonan:
Pa loke ta trata e premiacion entre coredonan esaki ta segun categoria di edad den damas y cabayeros. Pa e parti di damas esaki ta encera di 14-19 aña, 20-29 aña, 30-39 aña, 40-49 aña y despues 50 aña pariba. Mientras pa cabayeros ta premia den categoria di 14-19 aña, 20-29 aña, 30-34 aña, 35-39 aña, 40-44 aña, 45-49 aña, 50-54 aña, 55-59 aña y despues 60 aña pariba. Tur coredo ta ricibi un bunita trofeo di premiacion, como tambe ta premia e prome lugar coredo ‘overall’ den tanto damas como cabayeros.

Premiacion pa canadonan:
E participacion di canadonan na e ‘Turibana 10K’ tur aña ta hopi grandi. Pa cual e aña aki ta premia tambe na e prome 5 lugarnan den damas y den cabayeros.

Tur premio ta keda entrega mes diadomingo mainta despues di e competencia, net dilanti di Centro Deportivo Libertador Betico Croes na Santa Cruz, unda e careda ta finalisa.