Ta algun aña caba cu Oduber Agencies ta aporta na e parada di luz, den forma di regla T-Shirt pa esnan cu ta organisa y dirigi e parada di luz. E conocido “Lighting Parade” a bira popular localmente y internacionalmente dor di e tremendo organisacion cu tin tras di e parada aki. Diabierna atardi, net prome cu e evento di diasabra, gerencia di Oduber Agencies a haci entrega di e T-Shirtnan pa e parada di luz na Sr. Bibi Arends di Tivoli Club. E aña aki bateria Panasonic a percura pa carga e baterianan di tur e oficialnan pa por a dirigi un tremendo parada di luz, cu yen di luho, luz y un sin fin di entretenimiento!

E Parkeerplaats di Asociado tabata yena cu esnan buscando pa pasa bon diabierna anochi durante e Jump-In di Carnaval cu a conta cu Alberto Groeneveldt como emcee. E Jump-In di Carnaval a wordo organisa como un evento pa recauda fondo, diseña pa recauda asistencia financiero hopi necesita pa asociadonan cu miembronan di famia na Haiti, afecta enormemente pa e teremoto desastroso cu a tuma luga dia 12 di Januari.

Den Carnaval 56 Athlete Foot conhuntamente cu Nike ta “take care” di e canamento den parada. Mirando  e trabou incansabel di tur e miembronan di SAC, Athlete Foot a haci entrega di kedsnan marca NIKE na cada un di e miembronan di SAC, p’asina nan por sinti nan mes mas comodo durante parada. Di parti Stichting Arubaanse Carnival ta bai un danki na Athlete Foot pa nan coorperacion. Cu esaki Athlete Foot kier a desea e pueblo di Aruba y e team incansabel di SAC un bon Carnaval 56. 

Tabata un fin di siman hopi druk di carnaval y nos a bai tur caminda pa cubri esaki pabo. nos a pone tur potret di e lighting parade pa bo por wak kiko a pasa y tambe riba videoaruba.com nos ta poniendo video tambe. Un parada di luz cortico e anja aki pero tabatin hopi ambiente rond y den e parada.